Wekanhlanmẹ Tintan Hlan Kọlintinu Lẹ

Wekanhlanmẹ Tintan Hlan Kọlintinu Lẹ yin dopo to wekanhlanmẹ Paulu tọn lẹ to alẹnu yọyọ mẹ.

Hoyidọ delẹ sọn owe lọ mẹ

• Na Klisti do mi hlan, e ma yin nado yì baptizi, ṣigba nado lá wẹndagbe lọ; podọ e ma yin po hogbe nuyọnẹn tọn po gba, na yatin Klisti tọn ma nado yin hinhẹn zun ovọ́. Na nulunu wẹ hodidọ gando yatin lọ go yin na mẹhe to dindọn lẹ, ṣigba huhlọn Jiwheyẹwhe tọn wẹ e yin na míwlẹ he to yinyin whinwhlẹngán. Na e ko yin kinkandai dọmọ: “Yẹn na hẹn nuyọnẹn nuyọnẹntọ lẹ tọn gble, bọ zinzin weyọnẹntọ lẹ tọn wẹ yẹn na gbẹdai.” Fie wẹ nuyọnẹntọ lọ te? Fie wẹ wekantọ lọ te? Fie wẹ nudọntọ titonu ehe tọn lọ te? Be Jiwheyẹwhe ma ko hẹn nuyọnẹn aihọn tọn zun nulú ya? Na to whenuena e yindọ, to nuyọnẹn Jiwheyẹwhe tọn mẹ, aihọn lọ ma ko gbọn nuyọnẹn etọn titi dali yọ́n Jiwheyẹwhe, homẹhun Jiwheyẹwhe nado whlẹn mẹhe to yiyise lẹ gán gbọn nulunu he yin yẹwheho etọn dọ lọ dali. Na Ju lẹ to ohia lẹ biọ podọ Glẹkinu lẹ to nuyọnẹn dín; ṣigba míwlẹ to yẹwheho Klisti he yin hùhù do pòtin ji tọn dọ, ehe yin ahlidanu de na Ju lẹ, ṣigba nulunu na akọta

lẹ. Etomọṣo, na mẹhe yin yiylọ lẹ, yèdọ Ju lẹ po Glẹkinu lẹ po, Klisti yin huhlọn Jiwheyẹwhe tọn podọ nuyọnẹn Jiwheyẹwhe tọn. Na nuhe nọ yin pinpọnhlan di nulunu Jiwheyẹwhe tọn yọnnuin hú gbẹtọ lẹ, podọ nuhe nọ yin pinpọnhlan di madogánnọ Jiwheyẹwhe tọn dohuhlọn hú gbẹtọ lẹ. Mẹmẹsunnu lẹ emi, na mìwlẹ mọdọ to whẹho mìtọn mẹ, susu mẹhe yin yiylọ lẹ tọn ma yin nuyọnẹntọ to agbasa-liho, susu yetọn ma yin huhlọnnọ, podọ susu yetọn ma tọ́n sọn whẹndo he diyin lẹ mẹ, ṣigba Jiwheyẹwhe de nuhe aihọn nọ pọnhlan di pọnhlan di madogánnọ lẹ, nado dowinyan nuhe yin huhlọnnọ lẹ; Jiwheyẹwhe sọ de nuhe aihọn nọ pọnhlan di nuhe ma yin nujọnu lẹ podọ nuhe nọ yin nukunpẹvi yí dopọ́n lẹ, nuhe ma tin lẹ, nado hẹn nuhe tin lẹ zun ovọ́, na mẹdepope nikaa doawagun to Jiwheyẹwhe nukọn. Ṣigba, na ewọ tọn wutu wẹ mìwlẹ do tin to kọndopọ mẹ hẹ Klisti Jesu, mẹhe ko lẹzun nuyọnẹn sọn Jiwheyẹwhe dè na mí, podọ dodowiwa,hinhẹn zun wiwe po tundote gbọn ofligọ dali po, na e nido sọgan yin kẹdẹdile e ko yin kinkandai do dọmọ: “Mẹhe to awagundo, gbọ e ni doawagun to Jehovah mẹ.” 1:17-31

• Todin, mí nọ dọho nuyọnẹn tọn to mẹhe whèwhín lẹ ṣẹnṣẹn, ṣigba e ma yin nuyọnẹn titonu ehe tọn kavi dehe yin ogán titonu ehe tọn lẹ tọn gba, yèdọ mẹhe na yin hinhẹn zun ovọ́ lẹ.2:6

• Ṣigba, kẹdẹdile e yin kinkandai do dọmọ: “Nukun ma ko mọ podọ otó ma ko sè, mọjanwẹ ahun gbẹtọ tọn ma ko lẹn nuhe Jiwheyẹwhe ko wleawu etọn dai na mẹhe yiwanna ẹn lẹ.” 2:9

• Enẹwutu, mẹmẹsunnu lẹ emi, yẹn ma penugo nado dọhona mì dile yẹn nọ dọhona gbẹtọ gbigbọnọ lẹ do, adavo di gbẹtọ agbasanọ lẹ, yèdọ taidi ovivu lẹ to Klisti mẹ. Yẹn na mì anọ́sin, e ma yin núdùdù sinsinyẹn, na mì ma ko dohuhlọn ganji. Na nugbo tọn, etlẹ yin kakajẹ din, mì ma ko dohuhlọn ganji, na mì gbẹ́ yin agbasanọ. 3:1-3

• Yẹn do, bọ Apolo húsinna, ṣigba Jiwheyẹwhe wẹ to hinhẹn ẹn whẹ́n, sọmọ bọ mẹhe do ma yin nude, kavi mẹhe húsinna, adavo Jiwheyẹwhe he to hinhẹn ẹn whẹ́n. 3:6-7

• Be mì ma yọnẹn dọ tẹmpli Jiwheyẹwhe tọn wẹ mìwlẹ, bọ gbigbọ Jiwheyẹwhe tọn sọ nọ nọ̀ mì mẹ ya? 3:16

• Na e taidi na mi dọ Jiwheyẹwhe ko do mí apọsteli lẹ hia gbọngodo taidi mẹhe owhẹ̀ okú tọn yin didá na, na mí ko lẹzun nupinpọn de na aihọn lọ, na angẹli lẹ, podọ na gbẹtọ lẹ. Mí yin nulunọ lẹ na Klisti tọn wutu, ṣigba mìwlẹ yin nuyọnẹntọ to Klisti mẹ; mí yin madogánnọ, ṣigba mìwlẹ yin huhlọnnọ; mìwlẹ nọ yin yẹyidogona, ṣigba míwlẹ nọ yin winyando. Kakajẹ ojlẹ ehe mẹ, huvẹ gbẹ́ to mí hù bọ nugbla to mí hù, podọ po huhlọn po wẹ mí nọ mọ avọ̀ do, mí nọ yin hihò podọ mí ma tindo owhé, mí sọ nọ jẹtukla gbọn alọ mítọn lẹ yíyí do wazọ́n dali. To whenue yè to mí zun, mí nọ dona; to whenue yè to homẹkẹndo mí, mí nọ yí homẹfa do doakọnna; to whenue yè to oyín mítọn hẹngble, mí nọ dọho po homẹmimiọn po; podọ kakajẹ din mí nọ yin pinpọnhlan taidi ogbó aihọn lọ tọn, po dihónu etọn lẹ po.

4:9-13

• Enẹwutu, mì dike mí yí otọ́n hoho kavi otọ́n ylankan po ylanwiwa tọn po do basi hùnwhẹ lọ blo, adavo akla madotọ́n ahundopo tọn po nugbo tọn lẹ po. 5:8

• Na mẹdepope he yin yiylọ to Oklunọ mẹ to whenue ewọ yin afanumẹ de yin mẹtundote Oklunọ tọn; mọdopolọ mẹdepope he yin yiylọ to whenue e to edekannu yin afanumẹ Klisti tọn. 7:22

Na dile etlẹ yindọ yẹn tin to mẹdekannu sọn mẹlẹpo dè, yẹn yí dee do basi afanumẹ na mẹlẹpo, na yẹn nido sọgan duale mẹsusu tọn dile e yọnbasi do. 9:19

• Ṣigba, mẹmẹsunnu lẹ emi, yẹn dọna mì dọ, agbasalan po ohùn po ma sọgan dugu Ahọluduta Jiwheyẹwhe tọn, mọjanwẹ gbigble ma nọ dugu magble tọn do niyẹn. Mì pọ́n! Yẹn na dọ aṣli wiwe de na mì: Mímẹpo ma na damlọn to okú mẹ gba, ṣigba mímẹpo wẹ na yin didiọ, to ojlẹ dopo mẹ, yèdọ to nukunwhiwhe dopo mẹ, to opẹ̀n godo tọn lọ whenu. Na opẹ̀n lọ na dọnú bọ oṣiọ lẹ na yin finfọn do magble mẹ, bọ mí nasọ yin didiọ. Na dehe sọgan gble ehe dona ze magble do, podọ dehe nọ kú ehe dona ze ehe yin jọmaku do. 15:50-53

• Ylando wẹ adí he nọ hẹn okú wá, podọ Osẹ́n lọ wẹ huhlọn ylando tọn. Ṣigba, opẹ́ wẹ na Jiwheyẹwhe, na ewọ na mí awhàngbigba gbọn Oklunọ mítọn Jesu Klisti gblamẹ!

15:56-57